Tamil Nadu CM-in Manipur infiammite an state-a train turin sawm

Tamil Nadu chief minister MK Stalin chuan Manipur-ah tualchhung buaina a chhuah avangin state chhunga infiammite tan intihsiakna awm tur, Khelo India leh Asian Games-ahte training neih a harsa dawn tih a hriatpui tih sawiin, infiamite chu an state-a train turin a sawm.

CM Stalin chuan Pathianni khan thuchhuah siamin, Manipur infiammite, a bik takin hmeichhe infiammite chu infiamna huang hrang hrangah ram tana lawmman an hawn ṭhin avanga a ngaihsan thu a sawi.

Manipur boruak avanga training leh hmasawnna kawnga infiammite'n harsatna an tawh mek laiin, Tamil Nadu chuan boruak muanawm leh him tak hnuaiah infiammite an training an chhunzawm theih dan kawng siamsak an tum tih Stalin chuan a sawi a, an state-a youth welfare and sports development minister Udhayanidhi Stalin pawh ruahmanna siam tura a hriattir tawh thu a sawi bawk.

Tamil Nadu hian kum 2024-ah Khelo India games a thleng dawn a ni.