Prime Minister Modi chuan US Congress-ah thu a sawi thei a, India Parliament-ah Manipur chungchang erawh a sawi duh lo : Assam MP

Congress hruaitu leh Assam MP Gaurav Gogoi chuan central-a rorellai BJP leh prime minister Narendra Modi chu Manipur tualchhung buaina chhuak chungchangah na takin a bei.

Assam Congress MP chuan Manipur chungchang a sawinaah, PM Modi-an he thil thleng chungchangah engmah a sawi duh lo chu demawm a tih thu a sawi.

Gaurav Gogoi chuan, "PM Narendra Modi chuan US Congress-ah thu a sawi thei a, kan ram Parliament chhungah erawh a sawi thei lo," a ti a, Modi-a chuan France President Macron a kuah theih laiin, Manipur buaina tuartute erawh a kuah duh lo, a ti bawk. Rorellai BJP chu Parliament-a PM-in thu a sawi lohna tura an hum tlat avangin a sawisel a, Prime Minister leh BJP chuan Manipur buaina chu dan leh thupek-a buaina naranah angin an enliam a ni, a ti.

Gogoi chuan Modi chu Manipur buaina a chingfel theilo chung pawh chief minister N Biren Singh a ṭan tlat nachhan a zawt bawk.

"PM chuan CM-te a thlak thei. Mahse CM-in hleilenna thubuai za chuang ziah luh a ni tawh tia a sawi hnuah pawh, Manipur CM thuthlukna hi a thlawp tlat," tiin, "Manipur chungchang hi Parliament-ah uluk taka sawi ho kan duh. PM hian eptu party-te zawhna a tlanchhiatsan a ni," a ti.

Eptu party ṭangrual pawl, INDIA chuan Parliament monsoon session neih mekah Manipur buaina chungchang sawiho an phut a, PM Modi pawh Parliament in hnihah thu sawi turin an phut bawk.

May 3 aṭanga Manipur tualchhung buaina chhuaka mi tam takin nunna chan a, in leh lo leh sakhaw hmun pawimawh tam tak hal a nih hnuah, PM Modi hi Manipur chungchangah vawi khat chiah a la ṭawng chhuak. Hei pawh hi buaina chhuah aṭanga ni 77 hnua, Meitei hoin Kuki hmeichhe pahnih saruaka kawng an zawhtir lai video a darh hnuah, July 19-ah chiah khan PM hian Manipur chungchang hi a sawichhuak a ni.

Manipur police-ten mi 1 man belh leh

Manipur police-te chuan Kuki hmeichhe pahnih saruaka kawng zawhtirnaa mawhphurtu zinga pakhat an man belh leh a, he pawikhawihna kaihhnawihah hian mi pasarih an man tawh.

Police-te chuan hmeichhe pahnihte chunga thil thleng video a darh hnuah, July 20-ah mi pakhat an man a, hemi ni tlai lamah hian mi dang pathum an man belh leh bawk. A pangana chu Inrinni khan manin, pawikhawihnaa inhnamhnawih an man parukna chu kum tling lo a ni. Thawhṭanni kha a pasarihna hi Thoubal district-ah an man leh bawk.

West Bengal asssembly-ah Manipur buaina sawiho dawn

West Bengal assembly chuan Thawhṭanni aṭanga neih ṭan, assembly monsoon session-ah Manipur tualchhung buaina thleng chungchang an sawiho dawn.
All-party meeting-ah Manipur chungchang sawiho hi an rel a, meeting hi BJP chuan a boycott thung.

West Bengal-a rorellai, Trinamool Congress (TMC) chief whip Nirmal Ghosh chuan, 'Manipur-a buaina nasa tak chhuak leh, mihring tawrhna rapthlak tak thleng chungchang chu assembly-ah sawiho turin kan rel. Kan sawiho hun tur leh, eng 'rule' hnuaiah nge sawiho a ni dawn tih erawh chuan ka la sawi leh ang," a ti.

TMC chuan Manipur-a chi leh chi inkara buaina chhuak chu centre leh Manipur-a sorkarna siamtu, BJP-in inṭhendarhna policy a kalpui nghawng zel a nih thu an sawi.