Barak valley chhuahsan tura Mizo-te vaua puhna AAMSU-in a pha

All Assam Manipuri Students’ Union (AAMSU) chuan Barak Valley, Assam-a Mizo awmte Assam chhuahsan turin an hriattir tia media lama report awm chu thudik lo a ni, tiin an pha.

AAMSU chuan Thawṭannia thuchhuah a siamah, Barak Valley-a Meitei rama khawsa Mizote chu helai hmun chhuahsan tura thurawn an pekna thuchhuah an siam chu, Barak Valley-a Mizote vauna anga lakkawih a ni, tiin an tarlang.

"AAMSU chuan Mizoram chetdanin Assam-a awm Meitei-te thin a tih ur avangin, Meitei khuaa Mizo Missionary-te chu an himna turin fimkhur turin a chah ringawt a ni," tiin an sawi a, "Mizo missionary-te chu Meitei zingah chhungkhat angin an khawsa ho a, inrem takin kan khawsa ho zel ang," an ti bawk.

AAMSU chuan remna leh muanna an duh ber a ni tia sawiin, Barak Valley chhuahsan tura Mizote thurawn a pekna thuchhuah a lo siam tawh pawh a hnukkir tih a tarlang bawk a ni.