Manipur CM Biren Singh-a'n central lam hotute thu lo chuan ban a tum lo

Manipur tualchhung buaina a chhuah hnua state chhunga dan leh thupek kenkawh chungchanga nasa taka beihna tawk mek, chief minister N Biren Singh chuan midang nawrna avangin Chief Minister a nihna aṭanga ban a tum loh thu leh central lam hotute duhdan a nih chauhin ban a huam tih a sawi.

"Tunah chuan ban tumna ka nei lo a, central hotute'n bang tura min tih chauhin ka bang ang" tiin a interview-naah CM Singh chuan a sawi a ni.

Manipur-a hmeichhe pahnih saruaka khawlai fanpui video a darh hnuah Congress leh eptu party hrang hrangte chuan N Biren Singh chu CM aṭanga bang turin an nawr nasa hle.

Banna theh lut dawn ang leh BJP-in Chief Minister aṭanga bang turin an ti tih thuthang awm chungchang sawiin Biren Singh chuan, Manipur mipui thlan a ni tih a sawi. "Bang tura min tihna a awm lo. Mahse central lam hotute leh Manipur mipuiin an duh zawk a nih chuan, ka post hi ka chawlh san ang," tiin a sawi.

Biren Singh chuan, "Khawvela political party lian ber worker leh state pakhat Chief Minister ka ni. Central lam hotute thupek ang ang chu ka zawm ang. Tun dinhmunah chuan ka ngaihpawimawh ber chu Manipur-a dan leh thupek kenkawh leh a hma thei ang bera inremna siam a ni. Tun thlengin tumahin banna theh lut turin min la ti lo," a ti.

CM Singh chuan state-a buaina chhuah chhanah dan loa lo lutte leh ruihhlo tawlhte a puh a, "Dan loa lo lutte dang turin theihtawp kan chhuah a, hemi atan hian committee-te din a ni. Manipur-ah hian tribe 34 an awm a, chung zingah chuan Kuki leh Meitei an tel. State chhunga khawsa mekte chu an inngeih. Mahse, mi ṭhenkhatin kawngzawh chhuanlama hmangin buaina an chawkchhuak a ni," tiin May 3-a tribal-te'n kawng an zawh aṭanga state-a buaina chhuah chungchang chu a sawi.

"Dan loa lo lutte hi dan kan tum aṭangin buaina a inṭan. State pawn aṭanga lo lut, millitant leh ruihhlo tawlhtute thiltih a ni," tiin Chief Minister chuan a sawi a, Manipur-ah remna a awm leh thuai dawn tih a sawi bawk.