NHRC-in tharum thawhna titawp turin Manipur sorkar a hriattir
National Human Rights Commission (NHRC) chuan Manipur sorkar chu tharum thawhna a thlen tawh lohna tura hma la turin Thawhlehni zan khan a hriattir.
NHRC chuan thuchhuah a siamah hian, chi leh chi inkara buaina chhuak tuartute tana state sorkarin chhawmdawlna leh ṭanpuina a pek dante a zawt bawk.
"Thuneitute chu human rights palzuta a awm tawh lohna tur leh, tharum thawhna ti tawp turin thu pek a ni," tiin human rights panel chuan a tarlang.
NHRC thuchhuah chuan, "Manipur state chhunga buaina chhuak chhunzawn zel avanga human rights palzutna thlengte chu eng tiang takin nge state sorkarin a bawhzui dan ngaihchan mek a ni. Hei vang hian thuneihtute hmalakna hriat a pawimawh. Pawikhawihna thleng tam tak a bawhzuinaah hian commission chuan thutawp a siam hmain thuneitute hmalakna hriat hmasak a duh a ni, " a ti.
Tualchhung buaina chhuak tuartute leh an chhungte, mitthi chungte leh chhungkaw engzat nge tun thlengin state sorkarin a ṭanpui tawh tih a zawt a,nunna chan chhungte tan hna pek tum a ni em tih leh pek tum a nih chuan eng ang chen nge a kalpui tawhte tihte NHRC chuan a zawt bawk.
Commission chuan inremna leh inunauna a awm leh theihna tura an hmalaknate pawh zawtin, tharum thawhna titawp tur leh khawtlangah remna, muanna leh inpumkhatna a awm leh theih nana hma la turin sorkar a beisei thu a tarlang. Sorkar hmalak dan report hi kar hnih ral hmaa theh lut turin a ti a ni.