Manipur-ah broadband khapna thlahdul, Mobile internet la titawp chhunzawm

Manipur sorkar chuan tualchhung buaina a chhuah avanga thla thum dawn state chhunga broadband internet a tihtawp tawh chu Thawhlehni khan a thlahdul hlek a, mobile internet erawh tihtawp chhunzawm zel a la ni thung.

State home department chuan broadband connection chu static IP hmang chauha pek a nih tur thu leh, hman theih hun siam a nih thu te, hemi chhung pawhin routers aṭanga wifi hotspots phal a ni lo tih a sawi. Social media website-te chu block an la ni dawn a, suscriber-te chu system aṭanga VPNs software awm sa paih a, software/VPN App thar engmah install lo tura tih an ni.

Sorkar chuan internet tihtawp a nih avanga office leh zirna in hrang hrangin an tawrh dan te, in aṭanga hnathawkte bakah mobile recharge, LPC cylinder booking, bill pekna leh online service dang a nghawng avanga mipuite harsatna tawhte a hriatpui thu a tarlang. Kaihhruaina siamte zawm ṭhat a nih dan azirin, broadband internet khapna chu thlahdul chhoh zel a nih tur thu a sawi bawk.