NCW chief-in Manipur-a tihnawmnah tuartu hmeichhia 2-te a tlawh

National Commission for Women (NCW) chairperson Rekha Sharma chu May 4-a Manipur-a tihnawmnah tuartu, hmeichhe pathum zinga pahnihte chu Churachandpur-ah a hmu.

NCW chief Rekha Sharma chuan ni thum cham turin Manipur-ah hian a zin a, July 25 khan hmeichhe pahnihte hi a hmu a ni. Rekha Sharma hi buaina chhuah hnua central sorkar aiawha Manipur tlawhtu hmasa ber a ni.

Sharma hian state hotute leh police admisnitration official-te hmuin, a mi hmuh zingah hian chief secretary Vineet Joshi leh director general of police (DGP) Rajiv Singh an tel. Anni bakah hian, hmeichhe pawlte, khawtlang hruaitute leh buaina tuartu Meitei leh Kuzi-Zo hmeichhiate a hmu bawk a ni.

May 4-a Meitei mipuite chet dan rapthlak tak tuartu, Kuki hmeichhiate hi private ukil-in a dinsak a, CrPC Section 164 hnuaiah an statement record an la hmabak. Judicial Magistrate hmaa an statement pek chu pawikhawihtua puhte chungthu rel nan a ṭha tawk a ni. He thil thleng kaihhnawihah hian mi pasarih man an ni tawh a, police-te hian rinhlelh mi 14 an nei bawk.

Sharma hi Nilaini khan Delhi ah a let leh a, sorkar laipui hotute hmuin Manipur-a hmeichhiate chunga thil thlen dan report kimchang a pek thuai rin a ni.

Hmeichhe pahnihte chunga thil thleng video darh tuk, July 20 khan Sharma hian DCP leh Chief Secreatary-te chu he thil thleng chungchanga hma an lakna report ni li chhunga theh lut turin a lo hriattir tawh a ni. NCW chuan he thil thleng hi a bawhzui nghal dawn tih a lo tweet tawh bawk.

Social Media-a video a darh takah hian, Sharma chuan he thil thleng chungchang June 12-a NCW hnena complaint lut chu Manipur sorkar hnenah a lo thawn chhawng tawh tih sawiin, Manipur sorkar chu May 23, May 29 leh June 19-ah te lehkha an lo thawn tawh a ni, a ti.

NCW chairperson hnena complain theh luhah hian, Kuki hnam hmeichhiate chunga hleihlenna hrang hrang hmun ruka thleng tarlan niin, May 4-a Kangpokpi district-a hmeichhiate pawngsual rawn leh sawisak chungchang pawh a tel a ni.