Delhi sorkarin Manipur zirlaite tan School admission-ah ngaihhnathiamna a siam

Manipur zirlai, tualchhung buaina chhuak avanga Delhi khawpuia tlanchhiate tan Delhi sorkar chuan school admission-ah ngaihhnathiamna a siamsak.

Education Department additional director Nandini Maharaj chuan Manipur zirlaite tan special measure siamsak niin, Delhi school-ah admission an ti thei dawn tih a puang.

Delhi-a awm Kuki Students’ Organisation member pakhat chuan, sorkarin Manipur zirlaite tana admission-ah ngaihhnathiamna a siam chuan zirlaite leh, nu leh pate rilru a tihahdam tih a sawi.

Department of Education (DoE) thuchhuahah chuan, pawl 9 chin zirlai zawng zawngte chu admit phawt tura tih a ni. Pawl 9-12 zirlai, hmanhmawh taka Manipur an chhuahsan avanga document nei mumal lote chu, Deputy District Education (National Institute of Open Schooling)-in a pui dawn tih DoE chuan sawiin, Pawl 11 zirlaite chu Manipur School Board emaw CBSE emaw marksheet hmangin admit an ni ang, a ti.

Delhi School-a ṭha taka an kal chhunzawm theih nan, school head-te chu zirlaite leh nu leh pate tana Educational and Vocational Guidance Counsellor (EVGC) neihpui turin a hriattir bawk.

Zirlaite hian Hindi an thiam loh avangin a tam thei ang ber chu English Medium-ah luhtir an tum tih DoE chuan a sawi.