Manipur hmeichhe 2 video darh chungchang CBI kutah hlan dawn

Sorkar laipui chuan Manipur-a Kuki hmeichhe tihnawmnah video nasa taka darh chungchang chhui chian hna chu Central Bureau of Investigation (CBI) kutah hlan a tum.

Meitei mipa rualin Kuki hmeichhe pahnih saruaka kawng an zawhpui leh, an zahawmna tibawrhbang zawnga an chetna thleng chungchangah hian Manipur police-te chuan mi 10 dawn an man tawh. He pawikhawihna rapthlak tak thlenga a hnarkaitu bera puh, Pechi Awang Leikai mi Huirem Herodas Meitei (32) pawh man a ni tawh.Thoubal district-ah Pechi Awang Leikai hi man niin, video darh taa T-shirt hring haa hmuh a nih aṭangin man a ni.

CBI hian video darh chungchang a chhui tur bakah, Manipur buaina kaihhnawih case panga dang a chhui mek bawk a ni.

May 4-a thil thleng, social media-a video darh ta avang hian, state leh central sorkar chu nasa takin a buai phah a, ram chhung leh pawn aṭangin sorkar demna a ring hle. Parliament Monsoon session neih mekah pawh Manipur buaina avang hian rorel mumal thei loin an la awm mek bawk.

Nimina Lok Sabha rorel inkhawmah pawh eptu MP-te chuan Manipur chungchanga central leh state-a BJP sorkar hmalak dan duh khawp loa sawiselin an au leh a, rorel pawh tihtawp a ngai leh bawk a ni. Eptute hian Manipur chungchangah prime minister Narendra Modi ṭawng chhuak tura an phutna chu a hlawhtlin theih loh avangin, PM ṭawng chhuak tura nawrna atan Parliament-ah sorkar rintawk lohna, no-confidence motion an pu lut a, Lok Sabha Speaker pawhin a pawmsak tawh a ni. Eptu MP-te chuan motion put luh hi pawm a nih tawh avangin, thil dang ngaihtuah leh rel hmasa loa sawiho phawt an phut.

Supreme Court-in video darh chungchanga petition theh luh a ngaihtuah hma ni-ah sorkar laipui chuan CBI kuta hlan hi a tum ta a ni. Court-a affidavit a theh luhah, sorkar laipui chuan he case hi Manipur pawn lamah ngaihtuah a ṭul thu, chargesheet theh luh a nih aṭanga thla ruk chhung ngeia chhui zawh a ngaih thu a sawi.