Manipur-a buaina chhuak tharah mi 1 a thi, mi 10 an hliam

Manipur-a Bishnupur-Churachandpur district inrinaah Ningani khan security force leh Kuki-Zo inkarah buaina a chhuak a, mi pakhatin nunna chanin, mi 10 dang an hliam.

Bishnupur district kaltlanga Imphal khawpui leh Churachandpur inkalpawhna kawnga khua awm - Kwakta, Kangvai, Terakhongshangbi, Phougakchao Ikhai, leh Gothol khuaahte buaina hi a chhuak a ni.

Kuki-zo volunteer, Bolkot khaw tlangval Lunminthang (38) chu kah hlum a ni a, volunteer dang Lalboi Touthang (33), Jangkholen (26), leh Thangjahao (30)-te pawh kah hliam an ni. Lalboi hi a ban vei lam leh malpuiah kah a ni a, Jangkholen hi a kheimit ding lamah kah a ni. Hliam tuarte hi Churachandpur District Hospital-ah an enkawl.

Terakhongshangbi leh Phoubakchao khuaa bomb tihpuah avangin, state police commando leh Kumaon Regiment of Army mi leh sate zingah hliam tuar an awm ve bawk.

Terakhongshangbi khaw mi Sagolshem Priyobarta (21), Phoubakchao Ithai khaw mi Nameirakpam Ibomcha (40) leh mi pakhat dang pawh he khaw pahniha bomb tihpuak siperin hliamin, Imphal damdawi in pan pui nghal an ni.