INDIA MP-te'n July 29 leh 30-ah Manipur tlawh dawn

Eptu ṭangrual pawl, INDIA MP rualte chuan May 3 aṭanga tualchhung buaina chhuak tawh, Manipur boruak dik tak thlithlai turin vawiin hian Manipur tlawh an tum a, Pathianni pawh an cham ang.

Lok Sabha-a Congress WHIP Manickam Tagore chuan eptu MP 20-te Manipur-ah hian an kal dawn tih a sawi. Ṭangrual pawl INDIA zinga tel party tin chu, MP pakhat ṭheuh emaw, an aiawh emaw tir tura beisei an ni. MP-te hian Meitei-te inbenbelna hmun valley leh tribal awmna hill region-te bakah, relief camp-te an tlawh dawn a ni. TMC MP Sushmita Dev, JMM Mp Mahua Maji and NCP MP Vandana Chavan-te chu Manipur tlawh tur zingah hian an tel ngei rin a ni.

Eptu ṭangrual pawh hian Manipur tlawh tur hian chief minister-te tirh a rel zet a, mahse, veivahna lamah harsatna a awm avangin a ṭhulh a, MP rualte an kal dawn ta a ni. Eptu party zingah Left lam aiawh leh TMC party CM pahnihte chuan Manipur hi an lo tlawh tawh a, Congress hruaitu Rahul Gandhi pawhin Manipur hi a lo tlawh tawh bawk.