Kuki hmeichhe saruaka khawlai fanpuite hnenah Manipur sorkarin Rs nuai 10 ve ve a pe

Manipur governor Anusuiya Uikey chuan kar liam ta Inrinni khan Churachandpur relief camp a tlawh. Relief camp a tlawh pah hian May 4-a mipuiin an tihnawmnah, Kuki hmeichhe pahnihte hnenah Rs nuai 10 ve ve a hlan a, sorkar chu an lamah a ṭang tlat tih a hrilh.

Governor hian relief camp dangte pawh tlawhin, tualchhung buaina chhuak avanga awmna mumal neilo internally displaced people (IDP) te a kawm bawk. Sorkar chuan buaina chhuak tuartute hnenah zángnadawmna a pe dawn tih a tiam a, state ralmuanga siam tur leh mipuite hma hun thlirin sorkar chuan theihtawp a chhuah mek tih a sawi bawk.

Governor Uikey chuan Manipur ṭhalaite chu tharum thawhna titawp tur leh dan khap zawnga che lo turin a ngen a, state chhung mipuite an him theih nan central force ṭhahnemin hma la mek tih a sawi.

Manipur-ah hian dan leh thupek kenkawhna lamah harsatna lian tak a la awm reng a, hnam leh hnam inkara buaina chhuak avang hian chhiatna nasa tak a thlen bakah, awmna mumal nei lo mi tam tak a awm phah bawk a ni.