Moreh-ah journalist 8 chenna in halsak

Manipur-a Moreh khuaah journalist pariat chenna in halsak an ni. Journalist-te hi daily newspaper leh electronic media hrang hranga thawkte an ni.

He thil thleng avang hian All Manipur Working Journalists’ Union (AMWJU) leh Editors’ Guild Manipur (EGM)-te chuan thuchhuah inṭawm siamin, pawikhawihna thleng hi na takin an dem tih an tarlang a, security force-te chu eng vanga che lo nge an nih tih an zawt bawk.

Thuchhuahin a tarlan danin, in an halna hmun hi Assam rifle leh paramilitary force-te duty-na lai a ni a, security mi leh sate chuan he thil thleng hi ṭhelh an tum lo a ni.

Pawikhawihtute hian Moreh Tali Lambi hmuna People's Chronicle correspondent Lairenlakpam Maipak leh S Santipur-te chenna in chu an rawk hnuah, an halsak a ni. Anni bakah hian, journalist dang - Imphal Free Press correspondent Ashem Lalit, DDK correspondent B Ramchandra Sharma, AIR correspondent Leishangthem Brojendro, ISTV News correspondent Sagolsem Sanjoy, Impact TV correspondent Maibam Inaocha leh Sanaleibak correspondent Yumnam Mangang-te in pawh an hal bawk.

AMWJU leh EGM-te chuan heng journalist-te hi zángnadawmna pe vat turin an phût a, he thil thleng hi chhui chiang chiang tur leh pawikhawihtute na takin hrem turin an phût bawk.

"Journalist-te beih a ni hi Manipur-a press freedom atan thil pawi tak a ni. Sorkarin journalist-te himna leh zalenna tur a ngaihpawihmawh a ṭul takzet" tiin an sawi.