Relief camp-te dinhmun a ṭha tawk lo hle - INDIA

Manipur tualchhung buaina chhuak tuartute tlawh leh, state chhung dinhmun thlithlai tura kal, eptu ṭangrual pawl INDIA aiawhte chuan relief camp-te chu a ṭha tawk lo hle tih an sawi.

INDIA MP-te hian hmun hrang hrang an tlawh kual hnuah nimin khan Imphal-ah Manipur governor, Anusuiya Ukey hmuin memorandum an thehlut nghal a ni.

Memorandum-ah hian tualchhung buaina chhuak avanga mi 140 in nunna an chan leh, hliam tuar 500 chuang an awm tawh leh, chenna in leh building dang 5,000 chuang hal a ni leh, chenna nei loa mi 60,000 chuang awm mek chuan dan leh thupek kenkawh kawngah leh, state mipuite nunna leh an thil neihte venhimsak kawngah central sorkar leh state sorkar hlawhchhamna a tilang chiang hle a ni, an ti. Relief camp dinhmunte chu a ṭha tawk lo hle a, a bikin heng hmuna awm naupangte chu ngaihtuah hmasak an ngai a ni, tiin an tarlang.

Prime Minister ngawih rengna chuan Manipur tualchhung buaina chhuak leh thisen chhuahna chu a ngaih pawimawh tawk loh leh, a enhranzia a tilang niin an sawi.

Eptu MP 21-te hian Inrinni khan Manipur hi an thleng a, hemi ni hian Imphal, Moirang leh Churachandpur-a relief camp hrang hrang tlawhin, buaina chhuak tuarte hi an kawm bawk.

Governor an hmuh hnuah chanchinthar lakhawmtute an kawmnaah, Congress leader Adhir Ranjan Chowdhury chuan Manipur buaina chu chinfel thuai a nih loh chuan, ram pum security tan pawh harsatna a thlen thei dawn tih a sawi. Manipur an tlawh chungchang leh, an thil hmuhte chu Parliament-ah pawh an sawi chhuak dawn tih sawiin, state chhung boruak hi a chhiat zel avangin Parliament-a sawiho thuai pawh an phut dawn tih a sawi bawk a ni.