Assam sorkarin police outpost-te police station-ah hlangkai vek dawn

Assam sorkar chuan state chhunga police outpost zawng zawng chu police station puitlingah hlangkai vek turin thuthlukna a siam.

Chief minister Himanta Biswa Sarma chuan Assam-ah police outpost 250 a awm tih a sawi a, "Police station-ah leh a nih vek chuan, state chhungah police station 600 chuang a a awm tawh dawn. Hei hi mipuiin an chhawr tangkai hle dawn a, case ziahluh leh police koh pawh a awl sawt tawh dawn a ni," tiin a sawi.

Sarma chuan state sorkar chuan Home Guard leh Civil Defense wing chu DGP Assam nena belhbawm dan a ngaihtuah mek tih pawh sawiin, wing pahnihte tan inrelbawlna inṭawm hman a ni ang, a ti bawk.

Sorkar chuan district tinah police canteen leh Police Model High School siam vek turin hma a la mek tih sawiin CM chuan, school chu police nupuite enkawl tura tih a ni, a ti. Hei bakah hian, Forensic Laboratories thar pathum chu Silchar, Bongaigaon leh Dibrugarg-ah te dah belh a ni a, pathum dang siam tura hmalak mek niin, state pawn laboratory-te nen thawhho dan ngaihtuah mek a ni tih a sawi.

Assam CM chuan Rohingya chungchang pawh sawiin, Rohingya-te chu state chhunga an in benbelh loh avangin Assam tan an hlauhawm loh a ti a, hemi rual hian Assam chu kalkawngah an hman avangin ram tan a him lo, a ti. Sarma chuan Rohingya an ni emaw ni lo emaw, dan lo anga ramchhung lut hrim hrim chu dan kalh a ni a, sorkar hian dan khap thil hi a kalpui thei lo, tiin a sawi bawk.