Manipur: Hmeichhe 2 tihnawmnahte'n Supreme Court-ah petition theh lut
Manipur-a kuki hmeichhe pahnih, saruaka khawlai fanpuite chuan an chunga thil thleng chungchanga central leh state sorkar khinna petition chu nimin khan Supreme Court-ah an theh lut.
May 4-a Kuki hmeichhie pahnihte saruaka khawlai fan luihtir an nih lai video darh khan Manipur boruak a tichhe lehzual hle a, central leh Manipur-a rorel lai, BJP sorkar chuan sawisel leh dem a hlawh hle.
Manipur police-te chuan May 18 khan Thoubal district-a Nongpol Sekmai police station-ah tu tih hriat loh lakah ruk bo, pawngsual rawn leh tualthah case an lo ziak lut tawh a ni.
Supreme Court chuan sorkar laipuiin he case transfer a dilna chu nimin khan a ngaihtuah bawk a ni. Chief justice DY Chandrachud awmna bench chu Manipur tualchhung buaina kaihhnawih case chi hrang hrang hi July 28 khan ngaihtuah tura ruahman ni mah se, CJI dam loh avangin sawn hlat a ni.
Manipur buaina chungchang hi July 20 khan Supreme Court chuan suo moto cognizance lain, a bawhzui tur thu a puang a; state leh central sorkar chu rang taka hma la tur leh an hmalaknate Court hriattir turin thupek a lo tichhuak tawh bawk.
Hetih lai hian sorkar laipui chuan he case hi CBI hnenah transfer a nih thu tarlanna affidavit chu Home Secretary Ajay Bhalla-an court-ah theh lutin, hmeichhiate laka pawikhawihna hi a pawmzam dawn lo tih court a hrilh. Supreme Court hnenah Manipur tualchhung buaina kaihhnawih case-te chu state pawna ngaihtuah tura sawn dilin, thla ruk chhunga Manipur-a pawikhawihna thleng zawng zawng chu chingfel vek tura thupek tichhuak turin a ngen bawk a ni.
SC-in Meitei PIL theh luh a hnawl
Supreme Court chuan Manipur buaina chhuak chungchanga Public Interest Litigation (PIL) theh luh thar chu nimin khan a hnawl.
PIL-ah hian Manipur-a poppy chinna hmun leh, ruihhlo tawlhna chungchangte chu Special Investigation Team (SIT) chhuitir ngen a ni. Mahse court chuan petition-ah hian thil awm dan chiang leh fiah zawka tarlang tur leh, tuna an theh luh dan angah chuan hnam bil pakhat bitumna anga a lan thu sawiin a hnawlsak a ni.
He petition hi Mayanglambam Bobby Meetei theh luh a ni a, a aiawhtu senior advocate Madhavi Diwan pawh a petition hi hnuhdawh dilin, court pawhin a phalsak bawk.
Chief justice of India DY Chandhrachud leh justice pahnih - JB Pardiwala leh Manoj Misra-te awmna bench chuan, "He petition hian thil dik lo chu hnam pakhat thiltihah a dem bel vek avangin ngaihtuah leh bawhzui hi a harsa a ni," a ti.