Meghalaya sorkarin International Airport-a puang turin ngen

Meghalaya sorkar chuan Shillong Airport chu International Airport-a puang turin Ministry of Civil Aviation hnenah ngenna a thlen.

Kar liam ta Inrinnia 20th Annual Conference of Commonwealth Parliamentary Association (CPA) conference neihnaah,cheif minister Conrad K Sangma chuan Shillong airport chu Delhi, Kolkatta, Aizawl, Agartala, Imphal, Dimapur, Dibrugarg leh Guwahati-te nen inthlunzawmin thla tin zin veivak mi 10,000 an awm ziah tih a sawi.

"Sorkar laipui ṭanpuinain, Shillong Airport chu thlawhtheihna lian zawk ṭum theihna tura tihchangtlun mek a ni. Hmarchhak state ramri ramte nena inkalpawh theih nan Shillong Airport chu International Airport-a puang turin Ministry of Civil Aviation chu kan ngen bawk, hei hian nasa takin Act East Policy a pui dawn a ni," tiin Sangma chuan a sawi a ni.

CM Sangma chuan sorkar laipui hnenah lawmthu sawiin, Ministry of External Affairs-in Act East Policy hnuaia project a kalpuina aṭangin hmarchhak state-te chu ṭhenawm ram Myanmar leh Bangladesh te nen inzawmna ṭha zawk an siam a, hei hian insumdawnna tawnna thlengin hmasawnna a thlen a ni, a ti bawk.