Assam-ah Bajrang Dal-in ṭhalai 350 tan arms training buatsaih

Assam khawpui Guwahati aṭanga km 100-a hlaa awm Darrang District-a Mornoi khuaah right-wing Hindutva group, Rashtriya Bajrang Dal (RBD) chuan ṭhalai 350 bawr vel tan silai hman dan zirna training, ni sarih awh camping July 24 - July 30 inkar khan a buatsaih.

Camp-ah hian cadre-te chuan martial arts, ralthuam hman dan, dam khawchhuah dan, rang taka ngaihtuahna sen dan leh Vedic ritual-ah te training hi pek an ni. Training ah hian ideological orientation pek bakah hand-to-hand combat zirtir an ni bawk. Training pek ṭhalaite hi kum 18-30 inkar an ni a, Praveen Togadia kaihhruai RBD hian Assam ṭhalai 50,000 an la thar niin an insawi.

RBD vice-president Nilav Ritu chuan, training hi pek a ni ngei tih sawiin, Bangladesh aṭanga dan loa lo lutte'n state dinhmun an tihim lo a, hemi chhan letna tura training hi kalpui a nih thu a sawi. Camp-in a tum ber chu, jihadis rinhlelhte lo dang tur leh tualchhung buaina chhuak veng thei tura in buatsaihna a ni, a ti. "Dan loa lo lut Bangladesh mite'n an rawn beih thulhah, mipuite kan lo inven theih nan kan lo inbuatsaih a ni," tiin Nilav chuan a sawi.

Training buatsaihtute sawi danin, hetiang training hi India ram chhung hmun hrang hrangah neih a ni a, Assam-a Bangladesh mi tamna hmunah training hi pek belh zel tum a ni.

RBD hian kum 2018 aṭang khan Assam-ah arms training hi an lo kalpui tawh a; Tamulpur, Hojai, Dhubri, Nalbari, leh Mangaldoi hmunahte camping ṭum ruk lo nei tawhin, cadre 2400-in training an dawng tawh a ni.