SC-in Manipur-ah politics-a inhnamhnawihna nei lo team tir dawn

Supreme Court chuan tualchhung buaina thlen mekna, Manipur-ah politics lama inhnamhnawihna nei lo officer-te telna team a tir dawn.

Chief justice of India, DY Chandrachud chuan Thawhṭannia Manipur hmeichhe pahnih chunga thil thleng video darh chungchanga hearing an neihnaah hei hi a sawi lang a ni.

Supreme Court-in a tirh tur team-ah hian hmeichhia leh mipa judge te bakah, expert-te pawh an tel ang.

CJI Chandrachud chuan, "He thil thleng hi ṭum khat pawngsual rapthlak tawktu, Nirbhaya dinhmun nen khan a in ang lo. Manipur buainaah chuan pawikhawihna hrang hrang a thleng a ni," a ti. Court chuan thil thlengte hi a ngaihven hle a, rorelna kawnga mipuite'n rinna an nghah ngamna turin court chuan politics lama nihna nei lo leh inhnamhnawihna nei lo officer-te a tir dawn a ni, a ti.

Manipur buaina chungchanga Supreme Court inrawlh dan tur pawh sorkar hmalak dan a zir a ni ang tiin CJI chuan, "Sorkar chuan hma a la ṭha tawk hle nia kan ngaih chuan, kan inrawlh kher pawh a ngai lo thei," tiin a sawi.

Manipur tualchhung buaina kaihhnawihah hian FIR 6,523 theh luh a ni tawh a, heng zingah hian hmeichhia leh naupangte chunga hleilenna thleng chungchang 11 a tel.