Assam-ah thil man sang avangin Congress-in nawrh huaihawt

Assam-a eptu party Congress chuan state chhungah nitin mamawh thil man a san zel avangin BJP kaihhruai state sorkar leh central sorkar chu hma la tura nawrin Thawhṭanni khan lungawi lohna an lantir.

Congress party hian district commissioner kaltlangin state sorkar leh sorkar laipui hnenah memorandum an theh lut nghal bawk.

Guwahati-a lungawi lohna lantirnaa tel Congress MLA Jakir Hussain Sikdar chuan, "Nitin mamawh hrang hrang; petrol, diesel leh damdawi mante tihsan a ni. Congress-in central leh state-a rorelna a chelh laia thil mante leh tuna BJP sorkarna hnuaia thil mante hi tehkhin chi a ni lo. Central leh state sorkar chuan mipui an ngaihtuah tur a ni. Mipuite hian tuna thil man sang tak hi chuan engmah an lei thei lo ang. Chhungkaw pawisa lak luh hian inchhugkhur mamawh leina a phuhru zo lo," tiin a sawi.

Sikdar chuan sorkar laka an phut awm chhun chu, mipuite hmakhua ngai tur leh thil man tihniam tura hmalak hi a ni, a ti.

State women’s wing president Mira Borthakur Goswami pawhin thil man sang lutuk chuan middle class leh mi rethei zawkte a nghawng nasa tih sawiin, sorkar chu hma la turin a ngen ve bawk.

Nawrh huaihawttute hian gas cylinder lem leh thuziakte kengin, thil man tihniam tura ngenna bakah, BJP kaihruai sorkar demna thute an au rualpui bawk a ni.