Meghalaya state-in nurse hna nei lote tan job fair huaihawt dawn

Meghalaya sorkar chuan August 4 hian state chhunga nurse, hna nei lo tan ram pawna hna an hmuh theihna tur overseas nursing job fair a huaihawt dawn.

Meghalaya health minister Ampareen Lyngdoh tarlan danin, Shillong khawpuia State Convention Centre-a job fair neih turah hian, qualified nurse 1000 chuang an in register tawh a ni.

Thawnṭannia media mite a kawmnaah, Lyngdoh chuan job fair buatsaih chu labour department kutah dahin, health department nena ṭangkawpin fair hi an kalpui dawn tih a sawi.

Nurse in register-te chu thlan an nih chuan, Mumbai, Delhi leh Bangalore, khawi hmun berah emaw training turin an kal ang.

Lyngdoh chuan ram pawn lam Japan, United Kingdom, UAE leh Singapore-te pawhin Meghalaya state nurse-te chu chhawr an duh thu an sawi tawh, a ti bawk.

"He nursing fair-a lo telte chu ram pawna hnathawh an duhna hmunte ngaihtuahpui an ni ang. Sorkar chuan he thil atan hian sum a seng dawn a, skill development program hnuaiah kalpui a ni ang," tiin Lyngdoh chuan a sawi.