AP thingtlang tan kawng 91 leh lei 30 siamna tur sanction

Sorkar laipuia Ministry of Rural Development chuan Pradhan Mantri Gran Sadak Yojana (PMGSY) hnuaiah Arunachal Pradesh state tan infrastructure tihchangtlunna tur project ṭhahnem tak a sanction.

Arunachal Pradesh-ah hian km 720.75-a thui kawng 91 laihna tur leh lei (Bridge) sei chi 30 siamna tur sanction niin, sum sen tura ruahman zat hi Rs. vbc 757.58 a ni.

He project-in a tum ber chu state chhung district hrang hrang hmun 500-a khawsate tana inkalpawhna mumal siam a ni a, hnathawhna tur hian Changlang, Dibang Valley, East Kameng, East Siang, Kamale, Kra Daadi, Kurung Kumey, Lepa Rada, Lohit, Longding, Lower Dibang Valley, Lower Siang, Lower Subansiri, Namsai, Pakke Kessang, Papum Pare, Siang, Tawang, Tirap, Upper Siang, Upper Subansiri, West Kameng, leh West Siang khuate a huam.

Union minister for earth sciences leh Arunachal Pradesh (West) MP Kiren Rijiju chuan thingtlang hmasawnna atan he project hi a nawr a, kum nga chhungin hmasawnna a thlen belh zel dawn tih official thuchhuah chuan a tarlang.

Kawng leh lei siam tura hmalakna hian, Arunachal Pradesh chhunga socio-economic development-ah a ṭha zawngin nghawng a nei dawn tih sorkar thuchhuah chuan sawiin, infrastructure tihchangtlun a nih chuan hmun kilkawr zawkte kalpawh a awlsam phah dawn a;zirlai, lo nei mi leh damlote'n an chhawr ṭangkai dawn tih a sawi.