Manipur mipuite'n state sorkar an ring zo tawh lo - DCW Chief

Delhi Commission for Women (DCW) chairperson Swati Maliwal chuan Manipur tualchhung buaina a hmun ngeia thlithlai tura a zin hnuah, a thil hmuh dan report chu president Droupadi Murmu hnenah a thlen.

Swati Maliwal hian Manipur a tlawh ṭum hian Meitei leh Kuki hnam aiawhte pawh a kawm a ni.

President Murmu hnena report a theh luhah, DWC hotu chuan Manipur mipuite chuan chief minister N Biren Singh kaihhruai BJP sorkar chu an ring zo tawh lo tih a sawi.

DCW hotu chu Manipur-ah President Rule puang vat turin a ngen a, hei bakah hian Supreme Court judge ṭang lai kaihhruai, special investigation team (SIT) chu Manipur buain athlen dante chhui chiantir turin a phut bawk.

Maliwal chuan thla thum chhunga Meitei leh Kuki hnam inkara buaina chhuak, mi 150 dawnin nunna an chan phah tawhna chu a chhan dik tak chhui chhuak turin SIT hi din ngei a ṭul tih a sawi a, buaina chhuak tuar mekte chhawldawlna turin zangnadawmna, Rs. nuai 25 pe thuai turin a ngen bawk a ni.

DCW hotu chuan, "State sorkar chuan Delhi Commission for Women hnenah hmeichhiate chunga mipat hmeichhiat lam hawia pawikhawiha thleng chungchanga FIR theh luh zawng zawng copy chu a pe ve tur a ni. DCW chuan heng hmeichhiate hian nunphung pangngai an neih leh theih nan hma an la ang," tiin report-ah hian a tarlang.