Meghalaya minister thar pahnih lalut

Meghalaya Governor Satya Pal Mali chuan Ningani khan Meghalaya Democratic Alliance (MDA) sorkara minister thar atan Dasakhiat Lamare leh Renikton Lyngdoh Tongkhar-te chu rinawmna thu tiam tirin a lalut. 

Chief minister Conrad Sangma chuan Nilaini zan khan a cabinet siksawiin, minister pahnih -  Hill State People’s Democratic Party (HSPDP) member Samlin Mal­ngiang leh National People's Party (NPP) member Comingone Ymbon te a ban a, an aiah mi thar pahnih hi a ruat a ni. 

Minister atana lakluh thar, Dakashiat Lamare hi NPP MLA niin,  Renikton Lyngdoh Tongkhar hi HSPDP MLA a ni. Lamare hi kum 28 mi niin, state minister atana lakluh zinga naupang ber a ni.

Minister atana ruat thar pakhat, Dasakhiat Lamare hi commerce and industries minister ni lai Sniewbhlang Dhar tupa a ni a, an putuin council of minister-ah an awm dawn ta a ni. Anni bakah chief minister Sangma leh a u, James Sangma te pawh an awm dun bawk. 

CM chuan miniser tharte hi an chanpual a siamsak nghal a, Legal Metrology, Public Health Engineering, Secretariat Administration Department chantirin,  Dasa­khiat chuan Fisheries, General Administration Department and Public Works Department te a enkawl dawn a ni. 

Raj Bhavan-a minister thar pahnih lakluh inkhawmah hian chief minister Conrad Sangma, deputy chief minister Prestone Tynsong leh mi pawimawh dangte an tel.