Bajrang Dal arms training camp buatsaih; Eptu party-te'n chhui chian an phut

Eptu party Congress leh CPI(M) chuan Assam-a Darrang district hmuna Bajrang Dal-in ni nga awh arms training camp a buatsaih chungchang chhui chiang tur leh, a ṭul anga action la turin state sorkar an phut tih Thawhṭanni khan an sawi.

Congress Legislature Party leader, Debabrata Saikia chuan chief minister Himanta Biswa Sarma lehkha thawnin, district administration-te phalnaa arms training camp buatsaih an ni nge ni lo tih chhui chiang a, action la ngei tura a phut thu a hrilh.

Bajrang Dal member-te'n Mangaldoi-a school pakhata arms training an pek lai video ni ngeia ngaih chu Thawhṭanni khan social media lamah a darh a ni.

Saikia chuan, "Tun hi hetiang camp buatsaih ṭum khatna a ni lo. Kum 2017 khan Bajrang Dal chuan arms training camp hi a lo buatsaih tawh a, Congress chuan an lo dodal tawh a ni. Kum 2019 pawh khan state chhung hmun hrang hrangah hetiang camp hi neih a lo ni tawh bawk," tiin opposition leader chuan a sawi.

Saikia chuan state chhunga remna leh muanna awm tura hmalak a nih lai hian, pawl ṭhenkhatin sakhuana hmangin state chhungah dan leh thupek lekkawh an tum, a ti.

CPI(M) pawhin Bajrang Dal member-te'n zalen taka ralthuam an leklam thei chu police-in an chhui chian vat a ngai tih sawiin, an thil tih chu hnam leh hnam inkara boruak ṭha lo tuh tumna a ni, tih a sawi ve bawk.