Tripura CM laka lungawi lohna lantirin Journalist-ten Badge dum an bel

Tripura chief minister Biplab Kumar Deb-a'n kar thum liam taa media mite sawiselna thu a sawi sut tura an ngenna a tihhlawhtlin duh loh avang leh, sorkarin media mite hnena information pe lo tura official-te thu a pek avangin Tripura-a  Assembly of Journalist (AOJ)  chuan CM laka an lungawi lohna lantir nan nimin khan badge dum an bel. Hei bakah hian Prime Minister, Union home minister leh union minister of  broadcasting hnenah an lungawi lohna thlen an tum bawk. 

AOJ chairman Subal Kumar Dey chuan an state-ah media miten freedom of speech and right an neihte rahbeh sak tumna a awm a ni tiin, "State sorkarin official-te hnenah media mite information pe lo tura thu a pek tawh pawh sut turin kan ngen a ni. Chief minister hnenah pawh ṭum eng emaw zat lehkha pein, sawihona pawh kan nei fo a, mahse tun thlengin sorkar chuan a thupek a la sut duh lo a, hei vang hian sorkar news ziahna tur kawngah pawh thu dik tak ziah a harsa a ni," a ti. 

CM-in media mite a vau a, a ngaidam ngai dawn lo tia a sawi hnuah state chhungah media mi pariatin mipui kut an tuar tawh bawk a ni, tiin Dey chuan a sawi. 

Kumar Dey chuan media mite chungchanga a thusawi sut tura CM an phut chungchang pawh state Governor Ramesh Kumar Bais hnenah September 19 khan an lo hriattir tawh tih a sawi. Governor pawhin journalist-te lungawi lohna chu ṭha taka a ngaihthlak thu leh, CM sawipui a lo tiam tih a sawi. Governor hian  state sorkar leh media mite chuan boruak ṭha tak an neih a ṭul thu pawh alo sawi a ni.