Manipur HC-in a ruala ruang phum tumna dang rih

Manipur tualchhung buaina chhuaka thi, Kuki-Zo hnam mi 35-te ruang a ruala phum tumna chu Manipur High Court chuan kalpui rih lo turin a ti.

Nimin zing khan Manipur High Court-a acting chief justice MV Muralidharan chuan ruang 35-te Churachandpur district-a Haolai Khopi khaw hmuna a ruala phum tum chungchang hi ngaihtuahin, kalpui rih lo turin a ti. Kuki-Zo hnam chu kar khat chhunga ruang phumna tur ram pe turin thuneitute lama thlen turin a ti bawk a ni.

Indigenous Tribal Leaders’ Forum (ITLF) pawhin Ministry of Home Affairs (MHA) leh union home minister Amit Shah ngenna angin, ruang phum an tum hun hi ni ngain an sawn hla bawk. Mahse a hmun tur an dil ang phalsak an nih loh chuan ni nga hnuah an ruahman lawk angin an kalpui dawn tih an sawi.

International Meeteis’ Forum (IMF) chuan ruang 35-te phum an tumna hi Bishnupur district huam chhung, Sericulture Firm ram a ni tiin High Court-ah August 2 khan PIL a theh lut a ni. Hei hi nimin zing khan bench chuan a ngaihtuah nghal a, state chhung boruak thlirin leh, ruang phum an tumna hmuna hnam pahniha mi mi eng emaw zat an pun khawm leh avangin, boruak ṭha lo zawk leh thisen chhuahna nasa zawk thleng thei a ni a, hei vang hian ruang phum tum chu kaltlangpui rih loh a ngai niin a sawi. A thutlukna hi ITLF bakah ruang phum tur buaipuitu, Joint Philanthropic Organisation (JPO) a hriattir nghal a, August 9-ah hearing neih leh turin a dah.

Hetih lai hian Kuki-Zo pawlte chuan ruang phum an tumna, Haolai Khopi khua chu Churachandpur district a ni a, Meitei hoin Bishnupur chin nia an sawi chu thu dik lo a nih thu an sawi.

Manipur-a hospital hrang hranga tualchhung buaina chhuak avanga thi zingah ruang 88 chu lamtu nei loin dah an la ni. Thi zingah non-tribal ruang chu finfiah deuh vek tawh niin, an chhungte'n an lam tawh. Mitthi ruangte hi tunge an nih tih zawn chhuah hi police-te kuta awm a nih laiin, tribal nia hriatte ruang tam tak an nihna la hriat loin, chhe tawh takin an awm a ni.