Arms training petu RBD member 2 man

Assam-a Darrang district-a arms training camp buatsaihtu, Rashtriya Bajrang Dal (RBD) member pahnih chu Nilaini khan man a ni.

Darrang superintendent of police, Prakash Sonowal chuan Mangaldoi khuaa Maharishi Vidya Mandir school compound-a arms training camp buatsaih vangin RBD member pahnih, Bijoy Ghosh leh Gopal Boro-te chu man an ni a, judicial custody-ah dah an ni, a ti. Dan loa ralthuam hman dan inzirtirna buatsaiha inhnamhnawih dangte pawh man tuma chhui zui mek an nih thu a sawi bawk.

Thawhlehni khan training an buatsaihna school principal, Hemanta Payeng leh school administrator, Ratan Das-te man an ni tawh bawk a, mahse, bail-a chhuahtir leh nghal an ni.

Rashtriya Bajrang Dal chuan ni li awh training an buatsaihah hian ṭhalai 350-te chu silai kah bakah martial arts-te an zirtir a, political leh sakhaw thilte zirtir an nih thu an lo sawi tawh a ni. An thiltih hi state chhung eptu party hrang hrangin na takin an sawisel a, chief minister Himanta Biswa Sarma chu dan loa thiltia puha madrass tam tak a tihchhiat leh khar tir hnuah, Bajrang Dal-te chungah hian eng angin nge action a lak dawn tihte an zawt.