NESO palaite'n Manipur Governor an hmu

North East Students’ Organisation (NESO) palai, member 18 awmna chuan Nilaini khan Manipur governor Anusuiya Uikey an hmu a, an state chhung dinhmunte an sawipui.

NESO team hi chief advisor, Sumajjal Bhattacharya-a'n a ho a, Governor hnenah hian Churachandpur leh Moirang-a relief camp hrang hrangte dinhmun an hrilh bawk. State chhunga buaina chhuakin hmarchhak state dang zirlaite a nghawng dante an sawipui bawk a ni.

Hmarchhak zirlai pawl aiawhte hian Thawhlehni khan Imphal an thleng a, relief camp ṭhenkhat tlawhin heng hmuna awmte an kawm bawk. Manipur chief minister N Biren Singh pawh an hmu dawn a, state chhunga boruak ṭha leh ralmuang a awm thuai theihna tura hmalak dan turte an sawipui ang.

Governor Uikey pawhin NESO team-te chu ṭha taka lo dawngsawngin, hnam hrang kara inhuatna leh inrin tawn lohna awm ṭhin chu tihbo a ngai a ni tiin, zirlai pawlte chuan Manipur-a hnam hrang hrang inkara inunauna ṭha a awm theihna tura hmalaknaah mawhphurhna pawi­mawh tak an nei a ni, a ti. Buaina chhuak avanga zirlaite'n an zirna kawnga harsatna an tawh chungchangte chu prime minister hnenah pawh sawipui a lo tum dawn tih a hrilh bawk.