Manipur : Security force-te ralthuam ṭhahnem tak ru chhuak leh

Manipur-a Bishnupur district-ah Ningani khan mipui pung khawmte'n police ralthuam dahna rawkin silai leh a mu ṭhahnem tak an ru chhuak a, hemi ni vek hian Imphal West-a inkahna thlengah Manipur Rifles mi leh sa pakat kah hlum a ni bawk.

Police-te sawi danin, mipui pung khawmte chuan Bishnupur district-a Naransena-a second Indian Reserve Battalion (IRB) ralthuam dahna hmun luh chilhin, silai leh a mu ṭhahnem tak an ru chhuak. An ralthuam ruk chhuah zat tak hi hriatchian a la ni lo.

May 3-a Kuki leh Meitei hnam inkara buaina a chhuah aṭang khan, Manipur-a security force-te silai 4,000 chuang leh a mu nuai tel chu ruk chhuah a ni tawh a, heng zinga 1,600 chauh hi hmuh kir an la ni.

Ningania mipuiin ralthuam an ruk chhuah zingah hian AK-47 rifle, light machine gun, hand grenade leh bullet proof jacket-te pawh an tel.

Police-te chuan silai keng mi ṭhahnem tak chuan motor 40/50 velin ralthuam dahna hmun hi an pan a, anni bakah kea kal mi 500 velin an rawn pui bawk nia sawiin, vengtute an tam hneh avangin an tawn tlang a, kawngkharte tichhiain ralthuamte an ru chhuak tih an sawi. Mipui hnawh darh nan hian police-te chuan van lam hawiin silai ṭum 327 an hmeh puah bakah, tear smoke 20 pawh an hmang tih an sawi bawk.

Tribal group-in tualchhung buaina chhuaka thi, Kuki-Zo 35-te ruang a ruala phum an tumna chu duh loin, Bishnupur district-ah hian Meitei an pung khawm a, ruang phum tumna hmun panin nuho hmahruaina hnuaiah kawng an zawh a ni. Tribal pawlte hian Union Home Ministry ngenna angin ruang phum tur hi ṭhulhin a hun an sawn a, heti chung hian Meitei pung khawmte hian kawng an zawh lui a ni. Meitei-te hian ruang phum tumna hi sorkar ram, Bishnupur district huam chhung niin an sawi a, mahse, Kuki lam chuan Churachandpur district huam chhung a nih thu an sawi thung.

Kawngzawhte hi Rapid Action Force (RAF) leh Army-te chuan an lo dang a, pung khawmte hian security force-te hi lung leh hmanraw dang hmangin an tawng zui a ni. RAF hian mipui pung khawm hnawhdarh nan tear gas an kap bawk. Report ṭhenkhat chuan helai hmuna buaina chhuakah Manipur police ṭhenkhat central force beitu zingah an tel niin an tarlang. A hmatawnga awm, hmeichhe ṭhenkhat chuan hliam an tuar.