Bangladesh library-ah Khasi freedom fighter lim dah dawn

Meghalaya arts and culture minister Paul Lyngdoh chuan Bangladesh khawpui, Dhaka-a Indian Council for Cultural Relations (ICCR) hnuaia Indira Gandhi Cultural Centre (IGCC)-ah Khasi freedom fighter, U Tirot Sing lim dah a ni dawn tih a sawi.

Bangladesh-a India High Commissioner, Pranay Verma chuan British lak aṭanga India zalenna tura sualtu zinga mi, Khasi Hills freedom fighter U Tirot Sing lim dah hi Ministry of External Affairs pawhin a remtih thu a sawi niin Lyngdoh chuan a tarlang.

U Tirot Sing hi 1802-a piang a ni a, Khasi hills-a Nongkhlaw biala lal hnama mi a ni. Anglo-Khasi war hnuah man niin, Dhaka Central Jail-ah tantir a ni a, kum 1835, July 17 khan jail-ah hian a thi a ni. A thih ni hi Meghalaya state-ah chuan amah hriatrengna pualin, U Tirot Sing Day tiin vuah a ni.