Nagaland sorkarin in-service doctor-te hmun danga thawh a khap

Nagaland sorkar chuan sorkar hnuaia thawk mek doctor-te, non-practising allowance (NPA) la bawkte chu hmun dangah an thawh a khap. Thla khat chhunga private hospital emaw, partnership hmanga midang an thawhpuina emaw pawh ni se titawp vek turin a hriattir.

Health and family welfare department-in memorandum a tihchhuahah hian in-service government doctor, NPA la lote erawh chu thuneitute remtihpuinain, non-working hour-ah damlo mamawh zualte tan private-a rawn theih leh service phalsak an ni ang.

Private hospital, clinic leh nursing home-te pawh hriattirna pek vek an ni a, in-service government doctor-te bakah, sorkar hnuaia thawk mek nurse, technician leh health worker-te pawh chhawr lo tura tih a ni. He thupek zawm lo chu an license tihtawpsak theih an nih thu office memorandum chuan a tarlang bawk.

Department commissionr leh secretary, Y Kikheto Sema chuan sorkar hnuaia doctor leh health worker thawk mek zingah private-a practice ṭhinte chu an post lamah an awm ṭha lo hle tih hriat a ni, hei hian health care delivery system thlengin a nghawng tih a sawi. Hei vang hian private-a an thawh hi khap a ni tawh dawn tih a sawi a ni.