Manipur-ah buaina a chhuak thar leh chenna in 15 hal, mi 1 kah hliam a ni

Manipur-a Imphal West district-ah kar liam ta Inrinni tlai khan buaina thar a chhuak leh a, mipui pung khawmte'n chenna in 15 an hal.

Sorkar official-in nimina a tarlan danin, he buaina hi Langol Games village hmuna mipui pung khawmte aṭanga rawn chhuak a ni.

Security mi leh sate'n mipui pung khawm hnawhdarh tuma tear gas ṭhahnem tak an kah chhuah hnuah, buaina chuak hi an tireh thei niin official chuan a tarlang bawk.

Tharum thawhna chhuakah hian mi pakhat, kum 45 mi chu a malpui vei lamah kah hliam a ni. Hliam tuar hi Regional Institute of Medical Sciences (RIMS)-ah enkawl nghal niin, ngaihtuahawm lutuk a ni lo nia sawi a ni bawk.

Nimin zing lamah chuan boruak hian ziaawm lam a pan tawh a, mahse, state chhungah khuahkirhna kalpui reng a la ni thung.

Hei bakah hian, Imphal East district-a Checkon hmunah pawh kar liam ta Inrinni vek khan buaina thar chhuakin, sumdawnna hmun lian tak hal a ni. A bul hnaia in pathum pawh hal tel an ni a, mahse, kangṭhelhtute'n in kang hi ṭhelh mit-in hmun dang a kang kai lo.

Assembly constituency 27-a coordination committee chuan Inrinni khan Imphal valley-ah darkar 24 awh nawrh a huaihawt a, hemi kalpui mek lai hian hmun hnihah buaina hi a chhuak a ni.