Assam sorkarin naupang leh raipuar nuai 1 tan state pumah Indradhanush 5.0 a kalpui dawn

Assam sorkar chuan rampum huap Intensified Mission Indradhanush (IMI) 5.0 chu an state-a kalpuina turin vawiin hian khuhhawnna a nei dawn. He mission kaltlang hian, state chhung district hrang hranga naupang leh raipuar nuai 1 puih tum an ni.

IMI 5.0 hi vaccine la tura inzirtirna niin, a tum ber chu naupang kum 5 chin hnuai lamte vaccine pek vek leh, rampum huapa vaccine pek kalpui meka la ve hman lo raipuar-te zawn chhuah a ni.

Campaign hi chief minister Himanta Biswa Sarma-an Golaghat district-a Bokakhat hmunah vawiin hian a hawng dawn. Campaign hi round thumah ṭhenin thla tin neih a ni dawn a, round khat hian ni ruk chhung zel a awh ang. Round hmasa ber hi August 7-12 chhunga neih tur a ni a, round hnihna hi September 11-16 niin round thumna hi October 9-14 ah neih tur a ni.

"He campaign hian vaccine (MRCV) hmanga pumpelh theih natna inkaichhawn awl tak, measles leh rubella (MR) chu state chhungah tihrem a tum bawk. He campaign hmang hian measles leh rubella vaccine dose 2 state chhunga district tinah pek tum niin, 100-a 95-te chu vaccine laktir vek tum a ni. TD (Tetanus leh Diptheria) vaccine la ve hman lo raipuar-te pawh he campaign kaltlang hian vaccine lak tirtum an ni," tiin Assam Health Minister Keshab Mahanta chuan a sawi.

IMI 5.0 campaign hi district commissioner-te kaihhruaina leh enpuina hnuaiah, district tina health and family welfare department chuan department dangte leh UN puihnain a kalpui ang.

Assam Health Minister chuan, "He campaign hian naupang kum 0-5 leh raipuar vaccine la lo nuai khat bawr vel a pui dawn a ni. Round hmasa ber zawh hnuah hian, September leh October thlaa round 2 leh 3 neih turah campaign hlawkpuitu tur target thar siam belh zel a ni ang," tih a sawi bawk.

Minister chuan thingpui huan, ramhnuai, tlangram, pem khawm tamna leh tuilian tuarte tamna hmunte chu ngaihsak bik an ni dawn, a ti bawk.