August 21-ah Manipur Assembly session neih ṭan a ni dawn

Eptu party, Congress leh party dangte'n kawng hrang hranga an nawr hnuah, Manipur sorkar chuan August 21 aṭanga Assembly session neih a tum ta.

State cabinet chuan Governor Anusuiya Uikey hnenah 12th Manipur Legislative Assembly session vawi 4-na, August 21-a ko turin rawtna a thlen tih sorkar official chuan a sawi.

Assembly session neih turah hian, hun rei tak hnam leh hnam inkara tualchhung buaina chhuak leh a kaihhnawihin hmun a luah len ber rin a ni.

Chief minister hlui Okram Ibobi Singh kaihhruai Congress legislature party chuan July 26 khan Governor hmuin, India danpui Article 174(1) hnuaia special session ko turin Governor chu an lo phut tawh a ni.

Manipur-a President's rule puan phuttu Congress hruaitu chuan, state chhung buaina chungchang leh nunphung pangngai a awm leh theihna tura hma lak dan tur sawihona tur hmun dik tak chu state Assembly a ni, tiin vawi tam tak a lo sawi tawh bawk.

Tribal MLA 12 leh tribal pawl ṭhahnem tak chuan May 12 aṭang khan tribal te tana inrelbawlna hran neih phutin sorkar an nawr mek. MLA 10 zinga pasarihte chu rorel lai BJP MLA an ni.