Kuki MLA-ten Imphal-a kal an hlau, Meitei pawlin venhim an tiam

Manpur Assembly session chu August 21 aṭang hian neih tur a ni a, mahse Imphal-a session neih turah hian tualchhung buaina chhuak mek avangin Kuki MLA tam zawk, party hrang hranga mite chu an tel a rinawm lo niin Kuki hnam hruaitute chuan an sawi.

Hetih lai hian Kuki hnamten inrelbawlna hran an phut chungchang, Assembly-a member-ten lungrual tak an hnawl theihna tura session neih phuttu, Meitei pawl lian, COCOMI chuan tribal MLA-te hi Assembly session-ah an tel duh dawn a nih chuan an venghim dawn tih a tiam.

Churachandpur BJP MLA LM Khaute chuan Manipur-a dan leh thupek kenkawh ṭhat a nih loh avang leh, buaina a la chhuah reng avangin assembly-ah hian a tel ve loh tur thu a sawi.

Khaute chuan state chhunga buaina la chhuak reng leh inrelbawlna hran an ngiat chungchang bawhzuina mumal a awm loh avangin, Kuki-Zomi-Hmar MLA zawng zawngte chu session-ah hian a tel theih loh tur thu a sawi bawk.

Manipur-ah hian Kuki-Zomi MLA 10 an awm a, pasarih chu BJP party niin, Kuki People Alliance-in MLA pahnih an nei a, independent MLA pakhat a awm bawk. Kuki MLA 10-te hian Kuki-te tana inrelbawlna hran ngiatin sorkar laipuiah petition an lo thehlut tawh a ni.

Kuki People’s Alliance (KPA) president Tongmang Haokip pawhin, "MLA-te chu Imphal-ah an him lo ang. BJP MLA pakhat Vungzagin Valte pawh Imphal-ah hian sawisak a ni a, a la in enkawl mek," tiin, state leh central sorkar-in an himna tiama hmalakna mumal tak a awm a nih loh chuan an hlauhthawnna hi a reh dawn lo tih a sawi.

Kuki hnam aiawh an tel lo a nih chuan, Assembly session-ah hian tualchhung buaina chungchang sawina mumal leh awmze nei a awm tak tak thei dawn lo a ni.

Kuki pawl hrang hrang - Kuki Inpi Manipur (KIM), Kuki Students’ Organisation (KSO), Kuki Chiefs’ Association (KSAM) leh Kuki Women Union (KWU)-te chuan Kuki MLA-te chu Imphal-a zin lo tur hian thurawn an pe hlawm bawk.

Naga hnam pawl pakhat Naga Hoho pawhin, Manipur sorkar chuan Naga hnamte nena inremna a sawipui duh loh avangin Naga MLA 10-te chu session-ah hian tel lo turin a ngen ve bawk a ni.

COCOMI hian Kuki hnamin inrelbawlna hran an ngiat hi nasa takin an dodal a, an pawl thupuangtu Khuraijam Athouba chuan, "Manipur ṭhendarh tumna hi lungrual taka dodal a ngai. Central sorkar hian dan loa Manipur-a lo lutte zawnchhuah hna thawkin ruihhlo do beipui thlak a ngai," tiin a sawi.COCOMI chuan Kuki tam zawk chu Myanmar aṭanga dan loa lut ah puhin, Kuki khaw tam tak chu poppy chingah a puh bawk.