Delhi Police-in hmarchhak mite Google form fill up turin a ngen

Delhi Police chuan hmarchhak bial bakah, Darjeeling aṭanga kal Gorkha-te leh Ladakh aṭanga kal, Delhi-a chengte chu an him zawkna tur leh, police-te'n awlsam zawka venhim hna an thawh theihna turin Google form hmanga an chanchin kimchang thehlut turin an ngen.

Joint Commissioner of Police, Special Police Unit for North East Region, New Delhi, PN Khrimey chuan hmarchhak bial, Ladakh leh Darjeeling aṭanga kal mi ṭhahnem tak chu New Delhi-ah hian awm mah se, an chanchin mumal taka chinchhiahna a awm loh thu a sawi.

IPS Officer Khrimney chuan New Delhi-a cheng, hmarchhak bial leh Ladhak mi leh Gorkha-te chu Google form fill up turin a ngen a, form ah hian an hming leh anmahni chungchanga hriattur pawimawhte ziahlan tur a ni.

Google form hi social media, pawl leh zirlai hruaitute hmanga thehdarh tur a ni. New Delhi-ah hian hmarchhak leh tlang mite tihnawmnahna a thleng fo tawh ṭhin a, police-te pawh rawih an ni ṭhin a ni.