Manipur sorkarin Assam Rifle a thlak

Manipur sorkar chuan Bishnupur district-a dan leh thupek kengkawh tura 9th Assam Rifles a dah chu thlakin, an aiah Central Reserve Police Force (CRPF) 228th Battalion a dah.

State chhunga buaina a chhuah hnuah, Valley area-a cheng Meitei-te chuan AR sipaite hi thlak a, central force dah zawk turin an nawr fo a ni. August 3-a Meitei hmeichhe rual nawrh huaihawtte awmna lama AR sipaite'n silai leh tear gas an kah hnuah AR-te chhuahtir tur hian an nawr na zual a ni. He thil thlengah hian hmeichhe 50 chuang an hliam a ni.

Meitei hmeichhe pawl, Meira Paibi chuan Valley huam chhung district panga-ah Assam Rifles-te laka lungawi lohna lantirin nawrh an huaihawt a, Meitei mite chunga rawng taka cheah an puh. Tualchhung buaina a chhuah hnuah AR leh Manipur police intibuaite pawh social media lamahte hmuh tur a lo awm tawh bawk.

Thawhṭanni khan additional director general of Manipur Police (Law and Order) L Lailun chuan thupek tichhuakin, Manipur Police leh CRPF chuan Bishnupur leh Kangvai inkara check-post chu an veng tawh dawn tih a sawi.

Bishnupur district-ah inkahna thleng leh

Bishnupur district-ah Thawhṭanni khan security force leh ralthuam keng mi ṭhenkhatte an inkap leh.

Police-te sawi danin, Mualngat leh Terakhongsangbi area bakah, Gothol, Pholjang, leh Kwakta Ward No. 8 area-ah silai nen misual ṭhenkhat an che leh a, heng mite hi security force-te chuan kap letin, an hnawt bo thei niin a sawi. Inkahna thlengah hian thi leh hliam erawh an awm lo nia sawi a ni.

Security force-te chuan hmun hrang hrang an dapnaah silai pakua leh ralthuam dang an man tih an sawi bawk.