SC-in HC judge hlui 3 awmna committee din rawt

Supreme Court chuan nimin khan Manipur buaina thleng chungchanga petition theh luhte a ngaihtuah.

Supreme Court chuan Manipur-a hnam leh hnam inkara buaina chhuak chhui tur leh, chhawmdawlna kalpui dan turte ngaihtuah turin High Court judge hlui, hmeichhe pathum awmna committee din a rawt.

Court chuan Manipur-ah dan leh thupek ṭha taka kenkawh leh theihna tur chu an hmalakna tur a ni tiin, he committee hian buaina chhuak kaihhnawih case hrang hrang a chhui bakah, chhawmdawlna leh ṭanpuina kalpui dan turte pawh a ngaihtuah tel ang, a ti.

Committee member atan hian justice Gita Mittal (J&K High Court Chief Justice hlui), justice Shalini Joshi (Bombay High Court judge hlui) leh justice Asha Menon (Delhi High Court juge hlui)-te rawt an ni.

IPS officer hlui, Dattatray Padsalgikar chuan CBI thubuai chhuite a enpui dawn bawk a, state hrang hranga CBI aṭangin Dy. SP rank officer panga an tel dawn a ni tih court chuan a sawi bawk.

Heng bakah hian CBI kuta hlan loh, case dang awmte ngaihtuah turin Special Investigation Team (SIT) 42 an awm dawn bawk tih Supreme Court chuan a sawi. SIT-te hi Manipur state pawn lama mi, DIG rank officer-te'n an enpui dawn a, officer pakhat hian SIT paruk zel a vil ang.

Tualchhunga tharum thawhna thleng kaihhnawih chhui tur hian district tinah Special Investigation Team din a nih tur thu sorkar laipui chuan Supreme Court a hrilh a ni.