Assam college principal 3 in ABVP an zawm

Assam-a college principal pathumin Rashtriya Swayamsevak Sangh (RSS) hnuaia zirlai pawl Akhil Bhartiya Vidya Parishad (ABVP) an zawm avangin sawisel an tawk nasa hle.

ABVP-in an tarlan danin, Jorhat-a JB College, Lakhimpur-a North Lakhimpur College leh Silchar-a Gurucharan College principal-te chuan Pathianni khan ABVP hi an zawm a ni.

Sivasagar MLA leh Raijor Dal chief ni bawk Akhil Gogoi chuan ABVP zawm tura principal-te'n thuthlukna an siam chu a veiawm hle tih sawiin, college-a zirna boruak a tichhe thei dawn tih a sawi. "Engtin nge zirna ina principal meuhin political organization an zawm theih? Thil kal kawp thei lo a ni'" tiin Gogoi chuan a sawi.

"Bhawanipur Anchalik College principal Dr. Mukunda Sharma pawh consitution duh loh lantira nawrh huaihawt zingah a tel ve avangin suspend a lo ni tawh. Hetiang thil hi na takin kan dodal. Principal-te hian political party nena inthlunzawm zirlai pawl an zawm avang hian an chungah action lak a ni dawn em?" tiin Gogoi chuan a zawt zui.

Assam Trinamool Youth Congress president Bandip Dutta pawhin college principal-te'n political party an zawm chu pawmzam theih a ni lo tih sawiin, "Principal-te'n thlei bik nei loa zirna in inrelbawlna kalpui tura mipuite'n an beiseina nen a in kalh chiang hle," a ti.

ABVP lam chuan principal-te thlavang hauhin, eng pawl pawh zawm turin zalenna an nei a ni, a ti thung.