Manipur police-in Assam Rifle lakah criminal case theh lut

Manipur police leh Assam Rifle-te inkara intihbuaina a chhuah hnuah, Manipur police chuan AR-te chu an motor dansakah puhin criminal case an theh lut.

Security lam erawh chuan FIR theh luh hi dan hman sualna a ni tiin, AR hian Kuki leh Meitei inkara buaina chhuak tur veng tura Headquarters lam thupek an bawhzui mai niin an sawi thung.

FIR theh luhah hian, Manipur police chuan August 5-a silai lek lam kaihhnawiha Kuki militant-te zawn chhuah hna thawk tura Kwakta an pan chu, Pholjang kawngah 9th Assam Rilfe-te hian an lo dangin, Casper motor chu kawnglaiah an lo hung tlat niin an sawi. AR sipaite chetdan avang hian Kuki militant-te chu hmun him lamah an tlanchhuah theih phah a ni, an ti.

Defence lam chuan he thil thleng chungchangah hian, Assam Rifle chuan headquarters lam thupek an zawm mai a ni, a ti. State chhunga buaina a chhuah tirh aṭangin,central security force, a bikin Assam Rifle-te chuan mipuite nunna chhanhim a, boruak ralmuang a awm leh theihna turin rim takin an thawk tih Army thuchhuah chuan a tarlang.

May 3-a Manipur-a Meitei leh Kuki hnam inkara buaina a chhuah hnuah, Meitei-te chenna, Valley district-a Meitei civil society group leh BJP MLA-te chuan Assam Rifles-te hi ṭan lam neiah puhin an sawisel fo a ni. August 7 khan BJP state president chuan prime minister Narendra Modi hnenah memorandum theh lutin, AR sipaite chuan ṭan lam an nei a, hei vang hian Manipur aṭanga la chhuak turin mipuite'n an phut thu tih a sawi.

Meitei lamin an sawisel nasat leh nawrhte an huaihawt avangin, Manipur sorkar chuan Churandandpur-Bishnupur district-te inrinaa checkpoint-a Assam Rifles duty-te chu a lo thlak tawh bawk a, an aiah Central Reserve Police Force (CRPF) 228th Battalion a lo dah tawh bawk.