Meghalaya-Assam ramri buaina chinfelsak turin Meghalaya CM-in Prime Minister a ngen

Meghalaya chief minister Conrad Sangma chuan Thawhlehni khan New Delhi-ah prime minister Narendra Modi hmuin, Assam nena ramri buaina an neih mek chu chinfelsak turin a ngen. Sangma hi Assembly speaker Thomas Sangma leh cabinet minister-te'n an ṭawiawm a ni.

Meghalaya sorkar hotute chuan hemi chungchangah hian, Prime Minister hnenah memorandum an theh lut bawk.

Sangma chuan PM an hmuh chungchang sawiin, "Prime minister Narendra Modi hian kan harsatnate min hriatpui a, bawhzui a nih tur thu min tiam. Hun ṭha min siamsak avangin Prime Minister chungah kan lawm hle," tiin a sawi.

Assam-Meghalaya ramri chungchanga inhmuh thiam lohna awmah hian, CM Sangma chuan PM Modi chu state pahnihin ramri chungchang buaina an neih hmun 12 zinga hmun ruk la chinfel lohah hian inrawlh turin a ngen a ni. Sangma chuan heng hmun ruka buaina chinfel a nih theih nana zir chiangtu tur regional committee pathum din leh tura rawtna PM hnenah a thlen bawk.

Regional committee hi tun hmain din a lo ni tawh a; state sorkar pahnihte thawhpuinain, khaw mite thusawi finfiah, ramri rintlak rin ṭhat leh thil neihte chinchhiah hna an thawk a ni.

Assam leh Meghalaya state-te hian hmun 12-ah ramri buaina an nei a, chung zinga hmun ruk chu chinfel tawh niin, home minister Amit Shah hmaah March 2022 khan inremna thuthlung an ziak a ni. A bak buaina dang an la neihah hian ramri ṭha taka ṭhen fel a nih theihna turin state pahnihte hian joint survey an kalpui mek bawk.

Sangma chuan eight schedule-a Khasi leh Garo ṭawng dah chungchanga hmalakna kal mek bakah, Hynniewtrep National Liberation Council (HNLC) nena inrem tuma inbiakna an neih mek chungchang pawh a sawi chhuak a ni.