Manipur pualin Punjab-ah bandh huaihawt

Punjab-a Kristian pawl leh Dalit hnamte chuan Manipur state-a tualchhung buaina thleng mekah central-a BJP sorkarin buaina chingfel tura hma a lak ṭhat tawk loh leh, tun thlenga tharum thawhna thleng a la tihtawp theih loh avanga lungawi lohna lantirin nimin khan state pumah bandh an huaihawt.

State sorkar chuan bandh huaihawt a nih dawn avang hian boruak ṭha lo a thlen palh venthawn thilah leh, zirlai naupangte himna turin nimin khan school a khartir vek a ni. Dawrte pawh khar niin, highway tam tak khar a ni bawk.

Bandh hi zing dar 9 aṭanga tlai dar 5 thleng huaihawt a ni. Pawl leh party hrang hrangin an thlawp bawk a, an zingah hian Balmiki Tiger Force, Satguru Kabir Tiger Force leh Ravidassia Youth Foundation, Communist Coordination Committee (CCC) leh Marxist Communist Party of India- United (MCPI-U)-te pawh an tel.

Bandh huaihawttute chuan Manipur-a tualchhung buaina leh tharum thawhna nasa tak thlengah, central leh state-a BJP sorkarin hnam tlem zawkte tawrhna thleng chungchangah pawikhawihtute a thlawp zawk tlat chu an dem thu an sawi.