SOREPA-in Manipur-a I-Day lawmna boycott tum

Manipur-a helpawl pakhat, Socialist Revolutionary Party, Kangleipak (SOREPA) chuan August 15-a Independence Day lawmna neih tur chu boycott an tum.

Thawhlehni khan thuchuah siamin SOREPA chuan, August 15 hian official-te an chet chhuah theih loh nan zing dar 4 aṭanga tlai dar 4 chhungin mipui vei vak tur an dang dawn tih an tarlang.

Kum danga an lo tih ṭhin danin, Manipur sorkara Directorate of Public Relation-in Independence Day lawmna function-a chanchinthar lakhawmtute sawmna a tihchhuah hnuah, boycott a nih tur thu hi an puang a ni. Mahse service pawimawh; medical, tui sem, kang ṭhelh, sakhua leh vantlang function leh press-mite chu an dang dawn lo tih an sawi.

SOREPA hel pawl hi October 1,2021-ah an indin a, Kangleipak (Manipur) tiamin Western South East Asia (WESEA) huam chhunga tihduhdahna tuartute chhanchhuah hna thawktuah an in puang a ni.