Manipur video darh chungchanga Amit Shah thusawi sawisel

Congress party hruaitu, Jairam Ramesh chuan union home minister Amit Shah-a'n Manipur-a hmeichhe pahnih saruaka khawlai fanpui video darh hun chu a rinhlehawm tia a sawi chu thil zahthlak tak nia a ngaih thu Nilaini khan a sawi chhuak.

Ramesh chuan intelligence agency-te'n video darh chungchang an hriat loh thu a sawi khan, Shah chuan a laktlaklohzia amah ngeiin a inpawm a ni, a ti bawk.

Manipur-a hmeichhe pahnih tihnawmnah video hi Parliament-a monsoon session ṭan hma ni, July 19-ah khan a darh a, ramchhung leh pawn mipui tam tak thin a tirim hle.

Lok Sabha-a no-confidence motion chungchang Shah-a'n a sawi hnuah, Ramesh chuan, "Home Minister-in Manipur video rapthlak tak darh hun a ringhlel hi thil zahthlak tawp khawk a ni," tiin a sawi. "Intelligence agency-te'n video darh chungchang an hriat loh thu Parliament chhunga a sawi hian, India Home Minister a nih tlak lohzia amah ngeiin a pawm tihna a ni. Manipur Chief Minister laktlak lohzia pawh a pawm tel bawk," tiin Twitter ni ṭhin, X tia thlak takah a tarlang.

Shah hian video chu thil thlen hnu daihah a darh a, mipuiin hemi chungchang hi an hria a nih chuan, rang taka hma an lak theihna turin, police hnenah report vat tur a ni, tiin a sawi bawk a ni.