AAP, TMC-in oil palm chin an dodal

Aam Aadmi Party (AAP) leh Assam Trinamool Congress (TMC) chuan oil palm chinin tuiah harsatna a thlen theih avang leh, oil plam chin chhuanlama hmanga tlangrama ram inchuhsak tumna a awm theih dawn avangin, Assam-ah National Mission on Edible Oils – Oil Palm (NMEO-OP) chu kalpui lo turin Assam sorkar an ngen.

Hemi hma hian Assam Jatiya Parishad (AJP) chuan NMEO-OP hi an lo dodal tawh bawk.

NMEO-OP hnuaiah hian Assam sorkar chuan oil palm chinna atan hian district 18-ah ram hectare nuai 3.75-a zau chu company lian pali hnena pek a tum.

Assam chief minister Himanta Biswa Sarma chuan Upper Assaam-a Tinsukia district-a Saikhowa hmunah ram hectare 20,000-a zau chu oil palm chinna turin a lo hawng tawh a, oil palm hmun hi Ruchi Soya Industries Limited ni ṭhin, Baba Ramadev company, Patanjali Foods Limited company-in an siam dawn a ni.

Assam TMC president Ripun Bora chuan, "He thil hi thil veiawm tak a ni. Khawvela palm oil siam chhuak tam ber Indonesia chuan peatland hmunah pawh oil palm chin nghawng an tuar nasa a ni," a ti.

Bora chuan, "Chief Minister chuan Assam-ah ruah tui a tlak ṭhat ṭhin avangin harsatna thleng lo turah ngai mah se, sik leh sa inthlak avangin tun hnaiah Assam-ah ruahtui a tla tam tawh lo. Lei hnuaia tui a tlem tak avangin khawvel pawh sawi danglam a ni a, north pole leh south pole pawh meter thumin a che tawh, hemi ngawng hi kan la tuar dawn. CM hian environment lam tui mite pawh an hmin lo," a ti bawk.

AAP Assam president Dr Bhaben Choudhury pawhin, oil palm chinin environment a tihchhiat nasat thu sawiin; Indonesia, Europe leh ram dangah oil palm chin khap a nih laiin, eng vangin nge central sorkar hian northeast-ah leh Andaman and Nicobar Island-ahte oil palm ching tura hma a lak chhan hi ni ang, tiin a zawt.

Dr Choudhury chuan oil palm kung pakhatin nikhatah tui litre 300 a mamawh tih sawiin, "He thingkung hian lei hnuai tui a hip kang a, lei chu thil dang chin lehna tlak loah a siam. Hei vang hian kan hma lawkah tuia harsatna nasa tak a thleng thei a ni," a ti. "Bharatiya Janata Party (BJP) chuan hmarchhak state lakah hian colonized hunlai rilru a la pu tlat a, hei vang hian environment tichhetu bulpui ber, palm chinna hmun atan a rawn thlang a ni," a ti bawk.

Engvangin nge oil palm hi hmarchhak bialah chiah chin tura an tih, BJP sorkar hian eng research nge an neih tawh, tih zawtin Dr Choudhury chuan sorkarin research a lo nei tawhte chu mipui hriata puangzar turin a phut a ni.