AR hming tihchhiat tumin thil tam tak phuahchawp a ni : Army

Manipur police-te Kuki militant-te laka hma an lakna tur danga puh a, venhim hna thawktu Assam Rifles-te laka thubuai an theh luh chungchang chu Indian Army chuan a chhang let ve.

Indian Army chuan Manipur-a Assam Rifles-te hmalakna hrang hrangah, an hming tihchhiat tumin thil tam tak phuahchawp a ni tih a sawi. AR hi Indian Army command-na hnuaia paramlitary force upa ber a ni.

Indian Army Spear Corps chuan thuchhuah siamin, central security force, a bikin Assam Rifles-te hnathawh leh thiltihte sawisel leh sawi chhiatna tur hian thil phuahchawp a ni fo a ni tiin, May 3-a Manipur tualchhung buaina a chhuah aṭang khan AR sipaite chuan nunna chhanhim nan leh, boruak ṭha leh ralmuang a awm theihna turin rim takin an thawk a ni, a ti.

Manipur police-te hian August 5-a Kuki militant man tuma an kal chu AR hian Kwakta Pholang kawnga AR sipaite hian lo dangin, kawngpuiah Casper motor an dah a, an kaltlang thei lo a, hei vang hian Kuki helte hi hmun him lamah an tlanchhiat hman phah niin an sawi. An hnathawh dala puhin, AR lakah hian thubuai an theh lut zui a ni.