Manipur : Assam Rifles thlak lo turin tribal MLA-te'n PM ngen

Manipur-a tribal MLA 10-te chuan Ningani khan prime minister Narendra Modi hnenah lehkha thawnin, Assam Rifles sipaite chu hnam pahnihte inkara buaina chhuak zel tur vengtu an ni tih sawiin, Manipur-a duty chhunzawm tir turin an ngen.

Prime Minister hnena memorandum thehluhah hian MLA-te chuan, India-a paramilitary force upa ber Assam Rifle-te chu a din tirh aṭangin chhung lam leh pawn lam buaina laka ramchhung vengtute an nih thu an tarlang.

Tribal MLA 10-te'n hming an ziah hnan lehkhaah hian, Assam Rifle-te chu pawl ṭhenkhatin dik lo takin an puhchhia tih sawiin, Meitei hoin Assam Rifle an puhna chu thu belhchiandawl lo leh tribal mite beih an tumna a hlawhchham tak aṭanga lo irhchhuak a ni, an ti. Assam Rifle-te duty tihtawp a nih chuan Manipur-a venhimna kalpui mek a tihbuai bakah, state chhungah hnam hrang hrang inkarah buaina chhuah belh a hlauhthawnawm tih an sawi bawk.

Manipur MLA 40-te'n Prime Minister hnenah Assam Rifle-te thlak tura ngenna lehkha an thehluh tukah, tribal MLA-te hian Prime Minister hnenah vek thlak lo tura ngenna an thehlut ve nghal a ni. MLA 40 zinga a tam zawk hi Meitei an ni

Tribal MLA-te chuan vawiin thlengin Assam Rifle-te chuan central force hrang hrang BSF, ITBP, RAF, CRPF leh a dangte thawhpuiin Manipur-a buaina chhuak zel tur vengin rim takin an thawk a ni, an ti.

"Assam Rifle sipai zinga a tam ber chu hmarchhak mi an ni a, Manipur hi rei tak lo veng tawhin, khawchhung mipui inrelbawl dan pawh an hrechiang a ni. Tribal zinga buaina chawkchhuaktute chungah pawh dan an lekkawh tho a, hnam leh hnam inkara buaina chhuak zel tur vengin an nunna an thap tih kan hriatpui a ni," tiin memorandum-ah hian an ziak.

Tribal MLA-te chuan Assam Rifle-te chu hmun pawimawh aṭanga lachhuak leh dik loa taka an laka FIR thehlutah Manipur State Police-te chu puhin, AR-te chu hna thawk thei loa siam an tum a ni, an ti. Tribal hnam zawng zawng aiawhin Assam Rifle-te chu Manipur aṭanga la chhuak lo turin Prime Minister an ngen a ni.