I-Day zawhah Central, Assam leh ULFA-te inbe dawn

Central, Assam leh ULFA pro-talk faction chuan August 15, Independence Day hnuah inremna zawngin New Delhi-ah peace talk an nei dawn tih ULFA pro-talk faction leader Anup Chetia chuan a sawi.

Chetia chua peace talk an neih tur chu kumin chhungin an zawhfel hman a beisei thu reporter-te a hrilh.

"Inthlanpui neih hmain sorkar laipui nen inremna kan neih hman kan beisei. Inremna thuthlung hi min ziahpui chuan Assam buaina hi a reh dawn a ni," tiin Chetia chuan a sawi.

ULFA pro-talk faction hian kum 2011 lam daih tawh aṭang khan sorkar laipui hi an dawr tawh a, mahse inremna a la om thei lo a ni. PM hlui, Manmohan Singh kaihhruai sorkar nen khan inbiakna ṭha tak neiin, a hmawr bawkna thleng hman ṭep mah se, Narendra Modi kaihhruai sorkar tharah hian inbiakna mumal a la awm thei lo, tih ULFA chuan an sawi bawk.

North East Indigenous Peoples’ Forum convener nilai, Chetia chuan peace talk an neih hunah ULFA-I chief Paresh Baruah chu tel turin an sawm dawn em tih zawhna chhangin, "Baruah chu kan be tawh a, sorkar laipuiin amah leh a pawlte biak an duh leh duh lohah a in nghat. Tun thleng chuan sorkar laipui nen inbiakna a la awm lo. ULFA(I) thil phut a la ngai reng a, sorkar laipui lam hian an thil phut hi an pawm thei lo thung," a ti.

Chetia chuan Baruah chu Bangladesh-ah a awm loh thu leh, a awmna an hriat loh thu sawiin, inbiakna erawh an neih thu a sawi.

Sorkar laipui nena an indawrnaah hian, pawl dang an lo tel chuan Assam leh mipuite tan a ṭhat zawk tur thu pawh a sawi bawk.