Kuki pawlin LS-a Amit Shah thusawi chhang let; Myanmar-ah KDF an awm loh thu an sawi

Myanmar lama awm, National Organisation (KNO) Burma chuan union home minister Amit Shah-a'n Lok Sabha-ah Myanmar-a Kuki Democratic Front (KDF)-te chu India-ah lo lutin Manipur sorkar lakah buaina an chawk chhuak tia a sawi chhangletin, Burma ramah KDF an awm loh thu Ningani khan an sawi.

Amit Shah chuan Nilaini khan Lok Sabha-a thu a sawinaah, Manipur-a hnam leh hnam inkara buaina chhuah chhan chu Myanmar ram buai vangah puhin, Manipur-a hnam pahnihte chu inrem tuma inbe turin a ngen. Myanmar-a ram a buai avangin, raltlan sang tam tak chu Manipur-ah an lo lut tiin Parliament-ah a sawi chhuak.

KNO Burma president Letlam chuan, "Burma ramah hian KDF hmingpu Kuki pawl pakhat mah a awm lo tih chiang takin kan tarlang," tiin Ningani khan thuchuah a siam.

"Kuki National Army-Burma (KNA-B)-te hi Burma rama Kuki pawl awmchhun an ni. Khawvelin a hriat angin, Burma rama Myanmar sipai rorelna dik lo tak dodaltu pawl kan ni. Burma rama buaina hi a nasain, namen loin min delh rit a, Manipur-a hnam leh hnam inkar buainaah kan tel hman lo," tiin Letlam chuan a sawi.

"Kan khaw tam tam hi eng laia pawh beih reng niin, kan mite'n tihduhdah an tuar reng a, India-a tlanchhiat bak tih theih kan nei lo," tiin a sawi lang bawk.

"Kan mite raltlan in lo tuamhlawm avangin kan lawm a, sipai sorkar kan beihnaah hian hun pum kan sen avangin India rama pawikhawih hman kan ni lo. India hi kan ram thianṭhaah ngaiin kan innghahna a ni. Kan unit hi India ram chhungah chetla an awm lo tih chiang takin ka sawi duh. Parliament-ah pawh min sawifiah sak theih chuan kan lawm hle ang. Min puhna hi thil dang niloin, Manipur sorkar hlawhchhamna midanga puh tumna mai a ni," a ti.